ट्रॅजिडी श्रीधर तिळवे नाईक

कार्यकर्ते राजकारण लिहीतायत फेसबुकवर
त्यांना नेत्यांवरची निष्ठा प्रकट करायची आहे
आणि ह्या देशात फक्त खोटं बोलूनच
नेत्यावरची निष्ठा दाखवता येते

कुणाला तिकीट हवं आहे
कुणाला संघटनेत पद हवं आहे
तर कुणाला सामूहिक संरक्षण


कार्यकर्ते घाबरलेले आहेत कि
निष्ठा कशी मोजली जाणार आहे
आणि कोण मोजणार आहे

कार्यकर्त्यांना कळत नाहीये
आपल्यासारख्या सामान्य माणसाकडे
नेत्याची नजर कशी वळवून घ्यायची

कार्यकर्ते येनकेनप्रकारेण
स्वतःकडे लक्ष्य वेधून घेतायत

कोणी फ्लेक्स लावतायत
कोणी ट्रॉल करतायत

त्यांना बुद्धिमान लोकांशी विचारवंतांशी
काहीही देणंघेणं नाही

त्यांना माहित आहे
निवडणूक तिकिटप्राप्तीसाठी पदप्राप्तीसाठी काम करून घेण्यासाठी
इन्टिलेक्च्युअल्स निकम्मे आहेत

त्यांना राजकारण नीट कळलंय
आणि सत्तेची खार तरी आपल्याकडे वळावी म्हणून
ते कुणालाही राम करायला तयार आहेत
कुणासाठीही हनुमान बनायला तयार आहेत

रामांना माहित आहे कि हे कलियुगाचे रामायण आहे

ते रामाचा अभिनय करतायत

सत्ता हीच एक अभिनय होऊन गेलीये

कुणालाच सत्तेने काय साधायला जन्म घेतलाय
ह्याच्याशी देणंघेणं नाही

सर्वत्र अभिनय ऍक्टिव्हेट आहे
फेसबुक ट्वीटर व्हाट्स अप

चेहरा कुणाकडेच शिल्लक नाही

श्रीधर तिळवे नाईक
(निर्वाण सिरींजमधील आत्ताच्या कविता ह्या फाईलमधून )

मी आऊटडेटेड होण्याची वाट बघतोय
आणि तुम्ही माझ्या अजून तारखांपर्यंत यायलाही तयार नाही

कुठलीही क्रांती फक्त दहा वर्षे ताजी राहायला हवी
पण तुम्ही इतके नतद्रष्ट
अजूनही
१९६० ते १९८० दरम्यानचे मांस चघळत
खाण्याची आणि ढेकर देण्याची बक्षिसं घेता आहात

तुम्ही अजूनही अपेक्षा करता आहात कि
मी १९९० ते २०१० पर्यंतचे सारे मटण
तुम्हाला श्रीखंड म्हणून वाढावे
आणि तुम्ही मुखशुद्धी म्हणून
स्तुती चघळावी

मित्रांनो
डिजिटल जाऊन पोस्टडिजीट्ल आलं तरी
तुम्ही साठोत्तरी पोस्टी टाकत राहणार असाल
तर संगणकावर मोदीच अवतरणार

नुसत्या जुन्या बेंबट्या मारल्या कि पुरोगामी म्हणून
मिरवता येतं ह्या देशात
लोक असे बनेल झालेत
कि स्वतःचं मौनसुद्धा
बाजारात जाऊन ओरडून विकतायत
तुम्ही त्यांच्यातले आहात काय
स्वतःला विचारा

तुमच्या अनास्थेनंच हा अनास्थेशिया उभा केलाय
उद्या मेलेल्यांना डॉक्टर झाल्याची सर्टिफिकेट्स दिली जातील
आणि तुम्ही केवळ बक्षिसासाठी
पेशंट म्हणून ऍडमिट व्हाल

कॅपिटॅलिझम विरुद्ध सोशॅलिझम हा खेळ पुराणा झालाय
आणि धर्म तर आता ग्रीसमध्येही हेलेनिझमच्या नावाने कमबॅक करतोय
सॉक्रेटिस गोट्या चोळायला लागलाय तिथं धर्माच्या
जिथून सायन्सचा हात उगवला होता

हे गुंतागुंतीचं नेटवर्क आहे
जिथे दिलासा फक्त देव देतायत

तेव्हा पुरोगामी पिचकाऱ्यांनी ट्रोलिंगवाली रंगपंचमी खेळायचं बंद करा
जे आहे ते वसंताच्या अफवा आहे
आणि तुम्ही त्यांची नेहमीच्या देशीवादी सवयीनं
मूळं तपासत बसलाय

बसा
पुरोगामी बोटॅनिस्ट म्हणून मान्यता मिळवायला हे उपयोगी पडेल
पण एक दिवस
नसलेलं झाड खाली कोसळून
तुम्ही त्या झाडाखाली
खर्रर्रखुर्रर्र ठार व्हाल

हे भगव्या रंगाचं वादळ नाहीये
हा पांढऱ्या रंगाचा ऐतिहासिक प्रॉब्लेम आहे

तेव्हा ......

श्रीधर तिळवे नाईक
( निर्वाण चॅनेल सिरीजमधील आत्ताच्या कविता ह्या काव्यफाईलीतून )

मी फेसबुकवर असतो
तेव्हा मी फक्त फेसबुक असतो

मी पोस्ट वाचत असतो
तेव्हा ती पोस्ट असतो

पोस्ट टाकत असतो तेव्हाही
ती टाकली जाणारी पोस्ट असतो

कॉमेंट करताना कॉमेंट असतो
डिलीट मारतांना डिलीट

माझा उत्सव अखंड आहे
आणि तो तुमच्या ब्रेकिंग न्यूजच्या कुवतीबाहेर आहे

तुम्हाला हवं आहे हॅपनिंग
आणि मी बीइंग आहे

तेव्हा न्यूज देत रहा
कॉलम टाकत रहा

लाईक देतांना मी लाईक आहे

श्रीधर तिळवे नाईक 

(आत्ताच्या कविता ह्या काव्यफाइलीतून )

अचानक राज्य आलंय नयेंद्रथलाच
जो नाहीसा झालाय यूरेशियातून
आणि उगवलाय पुन्हा दक्षिण आशियात
होमो डेनिसोवन म्हणून

तो होमो सेपियनला हरवणार म्हणतो

तीन हजार वर्षांपूर्वी  त्याने समुद्र पार केला होता
एका छोट्या बेटातून
जमिनीच्या शोधात पाणी पार करत

त्याच्या बोटींना त्यावेळी नक्षत्रं जोडलेली होती
आणि पाणी मिश्यासारखे पिळत
स्वतःचा मायटोकोण्ड्रिया आभाळावर छापत
स्वतःच कपाळ वल्हवत
तो जमिनीवर पोहचला होता

मार्च २०१० मध्ये शास्त्रज्ञांनी त्याच्या बोटांवरून त्याला ओळखले होते
आणि सुरवातीला तो  तीरूपात होता
होमो सेपियनबरोबर त्याने वन नाईट स्टॅन्ड रचला होता काय ?
शास्त्रज्ञ ह्याबाबत कन्फ्युज आहेत

तो कितीतरी आधी होमो सेपियनच्या आईबाबांना
होमो सेपियनच्या आधी भेटला होता
आणि कसलीही हत्या न करता
परतला होता

तो २०१४ पासून सर्वांच्या विचाराधीन आहे
आशिया ते सैबेरिया त्याचाच डंका वाजतो आहे

त्याने होमो सेपियनचे एकुलता एक हे बिरुद
काढून घेतलंय
आणि आपण अधिक प्राचीन आहे
हेही सिद्ध केलंय

कुणालाच माहीत नाही
तो दंतकथा आहे कि सत्य ?

स्वर्ग आणि नरक 
दोन्हीवर एकाच बिग बॉसची  राजवट आहे 
ह्याची कृपया  सर्वच एकबिगबॉसवादी  बांधवांनी नोंद घ्यावी 

स्वर्ग आणि नरक 
दोन्हीवर अनेक बिग बॉसेसची  राजवट आहे 
ह्याची कृपया सर्वच बहुबिगबॉसवादी बांधवांनी  दखल घ्यावी 

स्वर्गात 
सर्वांसाठी जिओ मोबाईलची व्यवस्था आहे 
जिथे डेटा फ्री आहे कॉल फ्री आहेत अपलोड डाउनलोड फ्री आहे 

स्वर्गात 
बिग बॉसच्या व्यवस्थापनाची जबाबदारी इंटेलवर सोपवण्यात आली असून इन्फोसिसला आऊटसोर्सिंग देण्याचे मान्य करण्यात आले आहे 

स्वर्गाचे डिझाईन पूर्णपणे अँपलने तयार केले आहे आणि भारतीय सोडून इतर सर्व देशातील कॉन्ट्रॅक्टरवर बांधकामाची जबाबदारी टाकली आहे 

स्वर्गाचे मार्केटिंग मायक्रोसॉफ्ट करते तर आयबीम सपोर्ट पुरवते 

स्वर्गातल्या सर्व किंमती गेटवे ठरवत असून घासाघीस सांभाळण्यासाठी चार भारतीय बायका ऑन स्पेशल ड्युटी नेमलेल्या आहेत 

तेव्हा या 
स्वागतासाठी हॉलिवूड बॉलिवूड सज्ज आहे 

नरकात 
सर्वांसाठी जिओ मोबाईलची व्यवस्था आहे 
जिथे डेटा फ्री आहे कॉल फ्री आहेत अपलोड डाउनलोड फ्री आहे 

नरकात  
बिग बॉसच्या व्यवस्थापनाची जबाबदारी इंटेलवर सोपवण्यात आली असून इन्फोसिसला आऊटसोर्सिंग देण्याचे मान्य करण्यात आले आहे 

नरकाचे  डिझाईन पूर्णपणे अँपलने तयार केले आहे आणि भारतीय सोडून इतर सर्व देशातील कॉन्ट्रॅक्टरवर बांधकामाची जबाबदारी टाकली आहे 

नरकाचे  मार्केटिंग मायक्रोसॉफ्ट करते तर आयबीम सपोर्ट पुरवते 

नर्कातल्या  सर्व किंमती गेटवे ठरवत असून घासाघीस सांभाळण्यासाठी चार भारतीय बायका ऑन स्पेशल ड्युटी नेमलेल्या आहेत 

तेव्हा या 
नर्कासाठी  हॉलिवूड बॉलिवूड सज्ज आहे 

स्वर्ग आणि नरक ह्या दोहोंत 
फरक फक्त साईनबोर्डसचा आहे 
त्याविषयी काही अडचणी असतील तर एक दाबा 
अडचणी नसतील दोन दाबा 
कितीही वेळा बटन दाबण्याचे अनलिमिटेड स्वातंत्र्य आपणास देण्यात आलेले आहे 
गोंधळलेले असाल तर शून्य दाबत राहा 

(निर्वाण सिरींजमधील आत्ताच्या कविता ह्या कविताफाईलीतून )

परस्परविरोधी आजारातील बुडबुडा श्रीधर तिळवे नाईक 

परस्परविरोधी आजार चालून येतायत अंगावर

आणि

ह्यातल्या कुठल्या आजारानं मरायचं

हे ठरवणं मी सोर्सवर सोपवले आहे

डायबेटीस झालेल्या माणसाला

सारे आजार सारखेच

मरणाचं  मला काहीही पडलेलं नाहीये

फक्त वाट पाहणाऱ्या कार्याची

प्रायोरिटी लिस्ट

क्षणोक्षणी माझे प्रश्नक मला दाखवत असतात

त्यांना वाटते केवढा हा पसारा

आणि केवढी मर्यादित खोली

सर्वत्र सोर्स आहे

आणि त्याचा अंगठा

कुठल्या कार्यावर कुणाची मोहर उमटवायची हे ठरवतो

हे त्यांच्या गावी नाही

इतके आजार अंगारवाद्यांवर घेऊन

मी शांतपणे जगतोय

हे त्यांना चमत्कारिक वाटतंय

साधना करत असताना

डोक्यापासून मज्जरज्जुपर्यंत

पायाच्या अंगठ्यापासून हाताच्या बोटापर्यंत

माझी प्रत्येक गोष्ट ताणत गेली

आणि मी आपादमस्तक जखम झालो

माझे प्रश्नक
त्या जखमेपासून तयार झालेल्या जखमेत 
वावरलेल्या कविता 
फेसबुकवर टाकतात

ब्लॉगवर चिपकवतात

आणि वडिलांनी सगळे लिखाण

प्रकाशित करायचे वचन घेतले

ते बरे केले कि वाईट

ह्यावर आपापसात वाद घालतात

काहीही मोबदला न घेता

त्यांची चाललेली ही सेवा

आभाळाच्या भरवश्यावर चालते

आणि पावसाच्या तालावर हलते

मला दिसणारे प्लॅशेस 

फक्त मलाच का दिसतात

ह्या प्रश्नांचा त्यांच्यात अस्त झालेला नाही

ते साधनेच्या अंगाने प्रश्न विचारत राहतात

मी उत्तरे देत राहतो

प्रश्नक निघून गेलेत

सूर्य अस्ताला गेलाय

लॅपटॉपमधला खिडकीप्रकाश नाहीसा होतोय

सर्वत्र पाणी आहे

सर्वच पाणी आहे

माझ्या मृत्यूची दंतकथा रचत

बुडबुडा उमलतोय

श्रीधर तिळवे नाईक 
(आत्ताच्या कविता ह्या काव्यफाईलीतून )

========================================================================

इन्फर्मेशन द्यायचं व्यसन लागलेली एक स्त्री
एकामागून एक सेल्फी फोटोविडिओज धाडतीये

एक सेल्फीविडिओ हॉस्टेल डेला कॅटवॉक केल्याचा
एक सेल्फीफोटो ती ज्या लोकेशनवर शूट करणार आहे त्या लोकेशनचा
एक तिच्या कॉस्च्युम डिझायनरच्या नाकावर फुले इम्पोझ केलेला
एक गझल लिहितानाचा काफियाला थांबवून शूट केलेला

तिला माहित आहे
ह्याचा माझ्यावरचा परिणाम शून्य आहे
तिला मी हेही समजावलंय कि
माझ्यात कामवासनेचा अस्त झालाय

तरीही ती सेल्फीज धाडतिये
एकामागून एक एकामागून एक

ती नेमकं  काय चाळवतीये ?
आणि कुणात ?

श्रीधर तिळवे नाईक 

( आत्ताच्या कविता ह्या निर्वाण सिरीजमधील कविताफाईलीतून )

. shridhar tilvechi kavita

एक केऑस उतरतोय प्रत्येक ट्रेनमधून 

वेगाच्या कैफात 

त्याला आपलं डेस्टिनेशन गाठायचंय 

आणि वेग नियंत्रित करणारं 

कोणतंही कनेक्शन  त्याच्या पोटात नाही 

त्याच्या आत दबा धरून मॅडचॅपपणा 

वाट  पाहतोय 

त्या क्षणाची 

जो त्याला केऑसचे कनेक्शन मिळवून देईल 

गेली कित्येक वर्षे तो कनेक्शनची टेंडर्स भरतोय 

पण पूल ती नाकारत 

केऑसला जिवंत  ठेवतोय 

मॅडचॅपपणाला समजत नाही 

पुलाला रक्तात कसं लोळवावं 

तो फक्त वाट पाहतोय 

सुयोग्य शुटरक्षणाची 

शूटर क्षण येतोय 

एकाचवेळी दोन स्टेंशनवर चार ट्रेनस झटकत 

आणि दोन ट्रेनमधला केऑस 

स्वतःतील गर्दी पीत 

दोन पुलापाशी पोहचतोय 

एक पूल पाण्यात 

एक पूल कोरड्यात 

केऑसमधील गर्दीला पाणी अंगाला लावून घ्यायच नाहीये 

तिला पाणी फक्त प्यायला आवळतं 

अंगाला लावून घ्यायला आवळतं 

पाण्यापुढचा केऑस वळतोय कोरड्या पुलापाशी 

जो रुंद व्हावा म्हणून 

कधीपासून प्रशासनपुढे नमाज पढतोय  

दोन केऑस एक पूल 

मॅडमॅपपणाला कळून चुकलंय कि 

हा त्याचा क्षण आहे 

तो अफवा आणि बातमी पतंगासारखी उडवतोय केऑसमध्ये 

पत्रा कोसळलाय 

केऑस भयात बुडत चाललाय 

आणि नाकात पाणी शिरल्यासारखा 

जीव वाचवण्यासाठी पाळायला लागलाय 

केऑसचा प्रॉब्लेम हाच आहे कि 

केऑमधली लोकसंख्या अफाट आहे  

आणि जीव वाचवायला जावं 

तर मात्रे पुढेही जीव आहेत 

जीवांना मॅडचॅपक्षणाचे वेड लावलंय 

आणि जीव एकमेकाला मारत 

स्वतःला वाचवत-  धडाडतायत 

जे वाचलेत ते मुंबई नावाच्या स्वर्गात आहेत 

जे मेले ते मुंबई नावाच्या नरकात आहेत 

ब्रेकिंग न्यूज मुंबईभर फुटतायत 

चर्चा मुंबईभर फुटतायत 

आणि मॅडचॅपपणा  पुन्हा नव्या शुटरक्षणाची वाट पहात 

केऑसकडे कनेक्शनचे टेंडर टाकतोय